نسيت وتيهت روحي وهم بيك
وحسافه العمر خلصته وهم بيك
خويت وضيعت ناسي وهم بيك
اطلعت جذاب وهم تضحك عليه
*************
شكيت وكوه جبت الراس (عراس)
وبدي تاج الوفه لبسته (عراس)
عفته اليوم ثالث يوم(عرس)
وخبر عرسه الشماته انطوه اليه
*************
شهد شمام شربت شكر شفتك
شهد شلزم شعوفن شكض شفتك
شهد شاهد شهدلي بيوم شفتك
سلب روحي وتركني للاذيه
***********
ادك باب اليضربك واشتمنه
واشيل تراب جدمك واشتم منه
كول أمرني حبي واشمنه
حاضر لو ردت روحي هديه
************
اولي وماكلتلك ولي ساعـــــــــة
واحن لنار هجرك والساعـــــــــة
اذا لحظات اشوفك وله ساعـــــــة
احس بيك الزمن واكف بديــــــــة
**************
المسه كتله صباح الخير ....وبراك
اتمازح كال لولا اتوخز ....وبراك
كلت لا والذي صورك .... وبراك
بجبينك صبح ظنيت المسيه
***********
بهيمه ياظعن شوكي وناخوك
ونادوك اعلى كل محنه وناخوك
عضيدك آنه بالشده وناخوك
واصير احزام ظهرك للمنية
***********
يجرحي شكد اشدنك والافلاك
انة ادري بهيمة ومضيع والافلاك
نجوم الليل خل تشهد والافلاك
انة الميت اليمشي اعلة الوطية
*************
الف دنياي كلهة ماتلفني
عنيد وغير شخصك ماتلفني
عمت عين المنايا ماتلفني
الف دنية ومرة تلعب علية
**********
يروحي انتي حياتي وانتي عُمري
وإذا خرب زماني انتي..عَمري
تشع صيتي وكَعت وضاعـ امري
وروحي اليوم وصلت للمنيه
***************
نفضت الثوب لا بين ولا ثار
ولا طلاب اجة اليطلب ولاثار
كَلكَامش نهوا قصتة والاثار
صفت باللوفر أباريس هية
***********
كافي من الهجر بطل ولك عود
الك نغمه بوتر كلبي والك عود
تعال وشوف
هاي سيوف
تبقى جروح
ابد متروح
وكلب ثاني الك يحسب والك عد
واحبك لو تصب تيزاب بيه
************
حبيبي ارجوك تسمعني بهاداي
تراها الروح معلوله بهاداي
الك هالعين ارسلها بهاداي
بس ارجوك كلبي تعوفه اليه
************
بظلم قانون روحي منسنلها
سبوها وصار اكثر منسنلها
افرحت مابان ضحكت منسنلها
لان كل الالم والهم عليه
***********
عجب دنياي تبليني بشرها
وعليه تغيرت هي وبشرها
فرح للناس شو تعلن بشرها
وانا بشراها زفت بس اذيه
أنشدك ياهو أنت وياهو أنة
أشحلاتة الله حبنة ياهو أنة
كلبي ألكGoogle ياهو أنة
ألك مفتوح كل صبح ومسية
عليك الروح نص الليل ونت
لأن برغي الكلب مفتوح والنت
أدور عليك بالقاعات والنت
وينك ياحلو بس رد علية
تكلي ريح أكليبك شريحة
وأنت بهالبشر من ياشريحة
أذا موبايلك مابي شريحة
حط كلبي شريحة ودك علية
علاج أنت ودواي اليوصفونة
وبحبك أحتارو يوصفونة
أنة وأنت بلابل يوصفونة
بقفص وأثنينة نغرد سوية
روحي أدكول عدلة مانميتة
وعجب زرع الزرعتة مانميتة
وك هذا الليل كلة مانميتة
فراك وحرمو وصلك علية
منهو الجابك الشوكي وعناك
معقولة الهوة هزك وعناك
ترة الناس الحجت عني وعناك
أتغار أتريد مانكعد سوية
نشدت الناس عنك وأنتهينة
وعلى أفراكك تلفنة وأنتهينة
الكلب أنت تعذبة وأنتهينة
يظل أسمك حلو غالي علية
أنة جدمي شل هجرك ماتخطة
وسهم غدرك بكلبي ماتخطة
أسمي عالكبر لاماتخطة
أدفني عدل شمتاني بية
كتب حبك بنص الكلب كتبة
وصرت طالب وضاعن بيك كتبة
لعبت أنة أبغرامك طرة وكتبة
ولامرة كسبت الداس ألية
ألك ماأسحب أسلاحي والاقسام
معاهد فدوة تصبحلك والاقسام
لازائد جمع حبنة والاقسام
تفاركنة وصعب نرجع سوية
روحي وياك يالغالي راحت أني
وراح أنتظر جيتك راح أتاني
ظل مشلوع كلبي وراح أتاني
أحسهة من تجي ونكعد سوية
